¿Quén é?

¿O seu labor?
En Burdeos a “ficharon” o Syndicat des Vignerons des Côtes du Rhône e INTER RHONE. O Syndicat non é un sindicato como pode parecer polo nome, senón a asociación que agrupa a tódolos viticultores acollidos a denominación e INTER RHONE, é a interprofesional que agrupa a tódolos axentes sociais implicados na OAC Côtes du Rhône (as nosas DO en Francia son OAC, que é o acrónimo de Appellation d’Origine Contrôlée). Alí o seu traballo cubre tanto:

Labores de asesoramento técnico, xestionando as solicitudes de axudas para a implantación de novas viñas, porque en Francia as novas plantacións están obrigadas a ter unha asesoría técnica que inclúe análises de terras e un plano técnico asinado por un técnico colexiado, que se encarga de visitar as viñas e de certificar que se utilizan os portaenxertos e castes autorizadas e que a nova plantación faise conforme o plano técnico aprobado. Ademais se encarga da xestión da implantación das viñas para os agricultores do Syndicat, que é un labor máis específico que inclúe dende análises de terras, elaboración de consellos e plans de fertilización, en base os análises foliares que alí fan anualmente.

Tamén se encarga de colaborar co INAO –o equivalente ó antigo INDO que se encargaba de autorizar e seguir o funcionamento das Denominacións de Orixe- na revisión dos límites xeográficos e nos labores de control da OAC Côtes du Rhône. Tamén lle toca aporta-lo soporte técnico para os Programas de Protección da Paisaxe, que ten en marcha a OAC e o que lles están dando moita importancia nun país e unha zona, na que boa parte da promoción exterior baséase na identificación entre ó viño, as viñas e as paisaxes o que implica -entre outras cousas-, que tódalas zonas afectadas por unha OAC, han de ter un Programa de Protección das Paisaxes.
Ultimamente tamén lle toca traballar na identificación, investigación, caracterización e delimitación dos “terroirs”, labor que inclúe o asesoramento as cooperativas no intre de solicitar que se ampare as súas viñas con esa denominación, axudándolles p.ex., a buscar argumentos e dados para xustifica-la orixinalidade, tipicidade ou caracter diferencial dos seus térrenos.

Cando VITIGAL.com. lle pediu máis dados sobre esa labor en relación o terroir, dada a actualidade dos conceptos de “terroir”, pago, etc., consagrados na Nova Lei do Viño, Begoña nos dixo que tamén imparte a parte correspondente ó Terroir de Côtes du Rhône no Master Internacional de Viticultura e Enoloxía de Angers e que dirixe distintos proxectos de fin de carreira que os alumnos presentan nos centros do INITA de Burdeos, Montpellier e Toulouse.

Inda teríamos que falar da súa labor nos eidos da Difusión e a Comunicación a que tanta importancia dan os franceses, porque de cando en vez tócalle impartir charlas, cursiños, etc., sobre diferentes temáticas e técnicas de viticultura, a máis de facer un labor importante de Comunicación e Organización para as empresas adherentes a INTER RHONE, e todo eso sen esquecer as súas participacións periódicas en congresos nacionais e internacionais e as publicacións técnicas e traballos que de cando en vez publican nas revistas especializadas.

¿Como definirías a túa traxectoria neste mundo da Viticultura?
En poucas palabras: diría que comecei na Universidade ocupándome das relacións entre as viñas e o solo, seguín formándome en diferentes centros de Francia e Italia no eido da Ecofisioloxía e agora trato de poñer eses coñecementos o servicio dos productores, con unha labor qué inclúe tanto labores de extensión e difusión dos coñecementos, como de experimentación aplicada. En realidade tamén podería resumi-la miña traxectoria profesional dicindo que comecei na investigación e agora estou máis ben en labores de extensión.

¿De que te sentes especialmente orgullosa? (Nota dos redactores de VITIGAL.com.: esta é unha pregunta que fai arrebolar a Begoña, que non perdeu esa discreción e modestia tan galega)
Podería dicir que me sinto orgullosa de ter realizado ó primeiro -e único ata o momento- estudio detallado sobre os solos e as relacións solo planta (variedades e portaenxertos) nos viñedos galegos.
Si me apremas, podería engadir que tamén sinto un certo orgullo por chegar a conseguir un lugar, unha consideración e un certo recoñecemento da miña valía profesional, nunha zona con tanta tradición vitivinícola como a OAC Côtes du Rhône.
 terceira cousa podería debería ser o labor no eido da Zonificación Vitivinícola, porque estiven dende os primeiros tempos no Grupo Nacional de Expertos que marcou as liñas para a Zonificación Vitícola en Francia, e non o debín de facer moi mal, porque arestora podo –podemos- presumir de que unha dos tres membros expertos que representan a Francia no Comité da OIV para a Zonificación Vitícola é esta galeguiña, o que non está nada mal, sobre todo nun país tan “chovinista” como Francia.

¿Cales son as túas perspectivas?
No plano persoal, teño que dicir que o fillo que levo dentro sen dúbida, rematará de ancorarme neste país, polo que terei que ir esquecendo os soños de volver para a Terra.
No plano profesional, conto con poder seguir contribuíndo e aportando -inda que sexa modestamente- coñecementos e experiencias que axuden á evolución da viticultura. Tamén me gustaría volver a investigación e concretamente, a investigar en temas que poderían resultar de interese para mellora-la Viticultura galega.

E para rematar ¿cal é a túa ilusión?
Quizás podería dicir, que me sentiría honrada se algún día alguén dixese de min, que me esforcei e que contribuín –inda que sexa modestamente- a poñer os medios, para que conseguir que a Viticultura Tradicional ben feita, mantivera a súa posición de privilexio, o seu lugar, o seu peso e a súa importancia, no panorama vitícola mundial, fronte ós avances da Viticultura Industrial, representada polos novos países productores.
Sei que este é un tema do que non se fala moito en Galicia, pero ó que se lle está dando unha grandísima importancia en Francia, gran país exportador que se ve cada vez máis ameazado polos avances dos novos productores nos seus mercados tradicionais de exportación.
Son dúas filosofías enfrontadas: tradición fronte a tecnoloxía e probablemente, o remate a virtude estará nunha síntese das dúas, pero nesta loita eu estou coa tradición, co empirismo, coa historia, quizás por esa querencia conservadora que moitos asocian ó caracter galego.
Biquiños para todos e especialmente para VITIGAL.com. dende Avignón.

Begoña Rodríguez Lovelle
b.Rodríguez@syndicat-cotesdurhone.com

Nota de VITIGAL.com.: de cando en vez Begoña terá o detalle de comentarnos o que s e coce alá polas Costas do Ródano, xa que comprometeuse a colaborar con VITIGAL.com.