A XVI feira do Ribeiro que tivo lugar dende o venres 30 de abril ó domingo 2 de maio desenrolouse unha vez máis na capital do Ribeiro, creando grande expectación en tódolos medios de comunicación, con afluencia masiva de autoridades, persoas e persoaxes relacionados co sector.

O venres, 30 de abril, as 6.00 da tarde os nervios eran palpables en tódolos participantes do certame, xa que se esperaba con impaciencia ás autoridades encargadas da inauguración da Feira, que -como procede neste tipo de eventos- fixéronse esperar. As 6.30 horas D. José Antonio Bouza Escudero, presidente do Consello Regulador da Denominación de Orixe Ribeiro, saía a recibir á comitiva a Sampaio e as 7.00 da tarde aproximadamente chegaban a Ribadavia nos coches oficiais cos seus respectivos choferes.

Paráronse na calle principal da vila e dende alí fixeron o recorrido ata a praza maior a pé, acompañados pola Banda de Gaitas Virxe do Portal e por un folión de fogos, para asistir no Concello ó Pregón da Feira que correu a cargo do Presidente da Confederación de Cooperativas Agrarias da UE, D. Eduardo Baamonde.

A inauguración fíxoa o Conselleiro de Política Territorial D. Juan Miguel Diz Guedes, asistido polo Delegado de Política Agroalimentaria en Ourense, D. Manuel López Casas, a presidenta do Consello Regulador da Denominación Específica Orujo de Galicia Dª Isabel Salgado e o presidente do Consello Regulador da Denominación de Orixe Ribeiro D. José Antonio Bouza Escudero. Na comitiva tamén figuraban outros cargos e xente da política nacional, autonómica e local, que como é de recibo fixeron un percorrido por todas as casetas, probando os caldos das adegas e dos colleiteiros, vendo as novidades en maquinaria e visitando tamén, o quiosco de Vitigal.com. interesándose pola novidade e a nosa labor.

Despois da inauguración oficial da Feira os visitantes tiveron tempo de visitar, probar e compralos viños dos participantes, que por certo eran de moi boa calidade, alargándose a festa nalgunha caseta moito mais alá das 22.00 horas (hora oficial de peche do recinto feiral).

O sábado, 1 de maio, as 12.00 horas a nova Ministra de Agricultura, a ourensá Dª Elena Espinosa chegaba a recinto da feira con puntualidade británica, no medio dunha comitiva na que se mesturaban novas e vellas autoridades do partido dos socialistas, dende o Secretario Xeral D. Emilio Pérez Touriño, ata o novo Delegado do Goberno en Galicia D. Manuel Ameijeiras, asesores e alcaldes.

A Ministra -que facía así a súa primeira aparición en Galicia e na provincia da que é natural- parecía un pouco coitadiña, pero tamén visitou todas as casetas, parándose moito tempo no stand da Cooperativa Vitivinícola para interesarse pola elaboración do tostado do Ribeiro; tamén parouse no quiosco de VITIGAL.com., o portal da viticultura galega, onde lle contamos que é a primeira páxina galega de Internet galega deseñada especificamente para ofrecer información e servicios ó sector da Viticultura e lles ofrecemos unhas olivas para acompaña-lo viño.

Pola tarde tivo lugar a cata popular, que contou cunha afluencia masiva e que foi organizada polos técnicos do Consello Regulador da denominación de Orixe Ribeiro. Din que os viños -18 brancos e 19 tintos-, destacaban pola alta calidade ó que dificultou a elección dos 3 mellores e din tamén que as cousas estiveron moi parellas sobre todo no caso dos brancos, nos que a mellora da calidade tanto a nivel aromático como no paso pola boca, que se está notando nos últimos anos conforme vai aumentado a producción das castes autóctonas, abre interesantes perspectivas para a Denominación.

A noite a festa durou ata altas horas da madrugada, os restaurantes quedaron escasos para dar acollida ós centos de famentos que buscaban un sitio para degustar os manxares da zoa. Os – noutros tempos abundantes- bares de copas estaban a rebentar. Algúns privilexiados tamén puideron asistir a inauguración dun novo Hospedaxe Rural en Santo André, onde os responsables da adega “Casal de Armán” arranxaron unha preciosa casa rural -con habitacións que levan nomes de variedades autóctonas da comarca- onde os que gusten da tranquilidade poden relaxarse e probalo viño, que por certo, ademais de levar dous premios na presente Feira –primeiro a tintos e terceiro a brancos-, obtivo este ano o “Bacchus de plata”, sendo o único Ribeiro galardoado neste certame.
O domingo -o derradeiro día nesta edición da feira- a xente non estaba para moita festa e tardou en acudir, inda que a afluencia de visitantes foi grande pola tarde, sobre todo á hora da entrega de premios, que deixaron a algúns un pouco despistados e a outros cheos de ledicia.
O Comité de Cata Oficial decidiu que no apartado de adegas industriais, merecían premio as seguintes marcas: o primeiro premio de brancos ó Viña Amoriño vendima de ouro de Adegas Docampo; o segundo premio foi para Beade Primacía de Portela SAT, e o terceiro para Pazo Casanova de Pazo Casanova. Os galardóns para tintos foron para Bantiño, de Adegas Barbantiño, o segundo para Viña Do Campo, de Adegas Docampo e o terceiro para Alén da Istoria, da Cooperativa Vitivinícola do Ribeiro.
Na categoría de colleiteiros os brancos premiados foron, en primeiro lugar Lagar de Meréns, de José merens; en segundo lugar Sameiras, de Antonio Cajide e en terceiro lugar Casal de Armán, de Javier González Vázquez. No caso dos tintos, o primeiro premio foi para Casal de Arman; o segundo para Sameiras, de Antonio Cajide, e o terceiro para Barazal, de Elisa Collarte Fernández.
No canto a Cata Popular hai que dicir que os laureados foron practicamente os mesmos que os premiados polo Comité de Cata Oficial, xa que a xente recoñeceu a calidade de Casal de Armán, Pazo do Mar e Viña do Campo entre os Blancos, e de Sameiras, Alén da Istoria e Viña do Campo entre os tintos.

Como novidades do certame, cabe destacar o bo gusto para a elección das casetas nesta edición –inda que as dos colleiteiros quedaban algo pequenas- e sobre todo o lugar de celebración: a Alameda, na que cabe mais moita máis xente e que ademais, prestase para a celebración dun certame que pretende recuperar o lustre que tivo antano.
A exposición de maquinaria foi unha das novidades que máis chamou a atención de moitos dos visitantes e que está chamada a ir cobrando importancia en anos vindeiros, da man dos importantes esforzos de reestructuración dos viñedos que se están facendo na Denominación.

Pechamos esta crónica dunha XLI Edición da Feira do Viño do Ribeiro, que tivo como novidade máis salientable a presentación do “Tostado do Ribeiro”, que era un dos temas mais comentados no certame e que se non tivo un maior protagonismo, foi porque este ano inda non se puido degustar, entre outras razóns porque o seu regulamento non foi aprobado ata o 28 de abril de 2004 no Diario Oficial de Galicia (Orde do 19 de abril de 2004 pola que se modifica o Regulamento da Denominación de Orixe Ribeiro e o seu Consello), inda que xa hai varias adegas -a Cooperativa Vitivinícola do Ribeiro, Adegas Campante e a Portela SAT, e algunha máis- que traballan, fan probas, experimentan coa elaboración deste producto e andan as carreiras para poñe-lo canto antes no mercado.

Para a xente de VITIGAL.com. esta XLI Edición representou a posta a cero do marcador e o comezo dunha andaina que queremos que dure moitos anos.

Cristalina Álvarez Olleros
José Manuel García Queijeiro.